Қазақстандық жалдамалылар туралы ақпарат жасырын - ҰҚК

Бұған дейін белгілі болғандай, ресейлік «Вагнер» жеке әскери компаниясы соғысқа қатысу үшін Орталық Азия елдерінің, оның ішінде Қазақстан азаматтарын да жалдайды.

Кең тараған ақпаратқа сәйкес, Шығыс Қазақстан облысының бір топ тұрғыны жеке әскери компаниясына алынып, Ресей әскерлері жағында соғысып жатыр деген болжам бар. Сондай-ақ «Украинада бұған дейін де бірнеше қазақстандық жалдамалы сарбаздың қаза тапқаны» атап өтілді.

Ұлттық қауіпсіздік комитеті ҚазТАГ агенттігіне Қазақстаннан басқа елдердегі әскери қақтығыстарға қатысу үшін кеткендер туралы ақпарат қолжетімділігі шектеулі ақпарат санатына жататынын хабарлады.

Еске салайық, Қазақстан азаматының шет мемлекеттің аумағындағы қарулы қақтығысқа немесе ұрыс қимылдарына қасақана заңсыз қатысқаны үшін Қазақстан Республикасы Қылмыстық кодексінің 170 және 172-баптарына сәйкес жазалар көзделген. Сондай-ақ ҰҚК заң бұзушыларды анықтап, жауапкершілікке тарту шараларын қолданып жатқанын қосты.

Айтпақшы, Алматыда атышулы атқыш Игорь Дужновпен болған қайғылы оқиғадан кейін бұл азаматтың Украинадағы соғысқа орыс әскерлері жағында қатысқаны хабарланған.