Қазақстандық турист Пхукет теңізінде суға батып, комаға түсті

Қазақстандық турист теңізде шомылу кезінде өліп кете жаздады, ер адам қатты толқында су жұтып, тұншыып қалған.

Бұл төтенше жағдай туралы бір күн бұрын белгілі болды. Бүгін ҚР Сыртқы істер министрлігі ер адамның қазір ауыр халде жатқанын хабарлады.

«Отандасымыздың жағдайы ауыр, комада жатыр. Ол Тайланд билігінің ескертуі мен тыйымына қарамастан суға шомылған. Соңғы күндері Пхукетте күшті толқындар көтеріліп, жағаға қызыл жалаулар ілінген» делінген хабарламада.

Оқиға орнында құтқарушылар зардап шегушіге жасанды тыныс алдыруға тырысқан, кейіннен ол дереу келген дәрігерлерге тапсырылған. Қазір ол жансақтау бөлімінде жатыр.

«Оны Таиландтан Қазақстанға санитарлық авиациямен жеткізу үшін қазақстандық дәрігерлер консультациясының қорытындысы қажет, ол Тайланд дәрігерлерінің медициналық үзіндісі негізінде жасалады. Консул қазірдің өзінде бұл мәселені қарап жатыр. Жігіттің ата-анасы Пхукетке ұшып кетті және дипломаттармен бірге дәрігерлермен келіссөздерге қатысуда» деп хабарлады ҚР СІМ.

Сонымен қатар ҚР СІМ Таиландта демалып жатқан жерлестерге ескерту жасады: «Метеорологиялық шектеулер кезінде жергілікті биліктің ережелері мен талаптарын сақтауыңызды және теңізге шомылмауыңызды сұраймыз. Өкінішке қарай, бұл соңғы аптада Тайландтағы біздің азаматтарымызға қатысты екінші оқиға».