Қазақстандық  Шымкенттен Стамбұлға 1,5 келі алтын құйма алып өтпек болды

Ер адам кедендік бақылауда ұсталды, оның алып өтпек болған жүгінің жалпы құны 41 миллион теңгеден асты.

Шымкент әуежайындағы кедендік бақылау бекетінде бағалы металдарды заңсыз алып өтпек болған қазақстандық ұсталды. Одан жалпы салмағы 1,434 келі болатын екі құйма алтын табылған. Ол бұл «байлықты» алып, Стамбұлға  ұшып кетпекші болған, деп хабарлайды Orda.kz. тілшісі.

Ұлттық банктің ресми бағамы бойынша құймалардың алдын ала құны 41 миллион теңгеден асады. Ер адамға экономикалық контрабанда бойынша айып тағылды.

Аталған факті бойынша материалдар одан әрі сот ісін жүргізу үшін ҚР ІІМ Шымкент қаласы бойынша экономикалық тергеу басқармасына берілді.

Экономикалық контрабанда үшін 80 АЕК мөлшерінде айыппұл салуға немесе сол мөлшерде түзеу жұмыстарына, не 80 сағатқа дейін қоғамдық жұмыстарға тартуға, не мүлкі тәркіленіп немесе тәркілеусіз 20 тәулікке дейін қамауға алынуы мүмкін.

Егер ҚМА контрабанда аса ауқымды деп шешсе, ер адам үш жылға дейін бас бостандығынан айырылуы мүмкін.