Қазақстандық конькиші әлем чемпионатында алтын медаль жеңіп алды

Қазақстандық конькиші Алина Дауранова Германияның Инцель қаласында өтіп жатқан жасөспірімдер арасындағы әлем чемпионатының финалында алтын медаль жеңіп алды.

Ол 1000 метр қашықтықты 1 минут 17,98 секундта бағындырды. Бұл нәтиже оған бірінші орын алуға мүмкіндік берді. Күміс жүлде Нидерланд спортшысы Пиен Херсманға бұйырды, үздік үштікті итальяндық Серена Пергер жапты.

Сонымен қатар, Алина Дауранова 1000 метр қашықтықта жалпы есепте жеңімпаз атанды. Дәл осындай қашықтықта жастар арасында жалпы есепте қазақстандық Никита Важенин үздік нәтиже көрсетті.

Айта кетейік, жарысқа 28 елден 218 спортшы қатысуда.

Конькимен жүгіруден жасөспірімдер арасындағы әлем кубогы 5 ақпанда аяқталады.