Қазақстандық БАҚ сайттарына шабуыл жасалды

Бірқатар қазақстандық ақпараттық басылымдар өздерінің веб-сайттарына кіруге қатысты мәселелер туғаны туралы хабарлады.

Бірнеше ақпараттық агенттіктер мен  олардың пайдаланушылары жаңалықтар сайттарына кіру қиындап, кей сайт баяу ашылса, кейбір сайт ашылмай жатқанына, сайттағы ақпаратқа қол жеткізу мәселелеріне тап болғанын хабарлайды.

ҚазТАГ агенттігінің хабарлауынша, бірнеше ақпараттық басылымдар, соның ішінде toppress.kz, newtimes.kz сайттары, сондай-ақ қазақ тілді sn.kz сайты интернетке қосылуда қиындықтарға тап болды. Азаттық радиосының редакторлары да сайттағы ақаулар туралы хабарлайды. Toppress.kz сайты DDoS шабуылдары туралы мәлімдеді.

Бұған дейін бір айға жуық уақыт DDoS шабуылдарынан Оrda.kz сайты ашылмай қалған болатын, сонымен қатар holanews.kz сайты да бұғатталды. newtimes.kz редакциясы бұл мәселені зерттеп жатқанын хабарлады. Қазіргі уақытта кейбір ресурстар жұмыс істейді, бірақ үзіліспен, бір қосылса, бір қосылмай, арасында мүлдем тоқтап қалып жатқан жайлар бар.

Ақпарат және әлеуметтік даму министрлігі бұл жағдайға қатысты әзірге түсініктеме берген жоқ.