Қазақстандағы су тасқынын арнайы комиссия бақылайды

Елімізде су тасқынына дайындық жөніндегі үкіметтік комиссия құрылды.

«Қазгидромет» РМК болжамына сәйкес, 31 қаңтар мен 4 ақпан аралығында республиканың оңтүстігі мен оңтүстік-шығысында жаңбыр және көктайғақ түріндегі қатты жауын-шашын, сондай-ақ температуралық фонның жоғарылауы күтіледі. Осыған байланысты елде су тасқыны кезеңіне дайындық бойынша жедел шаралар қабылдау мәселесі тұр.

— Енді су тасқыны жағдайына байланысты күшейтілен дабылға көшу керек. Ауа райының қолайсыздығына байланысты қауіптің күрт артып отырғанын көріп отырмыз. Осы бағыттағы үйлестіруді күшейту үшін Премьер-Министрдің бірінші орынбасары Роман Скляр басқаратын арнайы үкіметтік комиссия жұмыс істей бастайды, - деді жиында Премьер-Министр Әлихан Смайылов.

Төтенше жағдайлар министрі Юрий Ильин Алматы, Түркістан, Қызылорда, Жамбыл және Жетісу облыстарында 30 қаңтардан бастап азаматтық қорғау бөлімшелерін іске қосу тапсырылғанын айтты. Оның айтуынша, жиналған ылғал қоры мен күтілетін жауын-шашын, қардың белсенді еруіне, еріген ағынды сулардың пайда болуына, мұз жарылуының әлсіреуіне және өзендерде судың көтерілуіне себеп болуы мүмкін.