Қазақстандағы сауда ЖІӨ құрылымында бірінші орында

Елімізде бір жарым миллионға жуық адам саудамен айналысады. Бұл 551 мың кәсіпкерлік субъектісі. Бұл ретте сала пайда алу және негізгі капиталға инвестициялау деңгейі бойынша артта қалып отыр.

Мұндай мәліметтерді Қасым-Жомарт Тоқаевпен кездесуінде Сауда және интеграция министрі Серік Жұманғарин мәлімдеді.

Вице-премьер сауда саясатын дамытудың жаңа тәсілдеріне тоқталды. Олар ішкі нарықты қорғауға, отандық өндірісті қолдауға және жаңа нарықтарды ашуға бағытталған. Электрондық коммерцияны дамыту, трансшекаралық және ірі сауда-логистикалық хабтарды салу қарастырылған.

Кездесу барысында Қазақстанның интеграциялық одақтардағы қызметі мен еркін сауда аймақтарын құру мәселелері қаралды. Министр Қазақстан делегациясының Иранға сапары барысында қол жеткізілген уағдаластықтарды да баяндады.

Мемлекет басшысы жаңа сауда форматтарын енгізу бойынша жұмысты жандандыруды тапсырды, сондай-ақ халықаралық нарықтарда ұлттық экономикалық мүдделерді белсендірек қорғау қажеттігін атап өтті.

Қазіргі уақытта ЖІӨ құрылымында елде сауда бірінші орында тұр (18,3%).