«Қазақстанда жасалған» жалпыұлттық жобасы іске қосылды

Негізгі әңгіме отандық тауар өндірушілердің басын біріктіріп, олардың өнімдерін ілгерілету туралы болып отыр.

Түркістанда «KazAgro/KazFood Turkistan2023» бірінші халықаралық сауда көрме-жәрмеңкесі өтуде. Бұл шара «Қазақстанда жасалған» жалпыұлттық жобасының іске қосылуының бастамасы болып отыр, деп хабарлайды Orda.kz Сауда және интеграция министрлігіне сілтеме жасап.

Көрме-жәрмеңкесінің мақсаты – елімізді және «Қазақстанда жасалған» ұлттық брендін әлемдік кеңістікте таныту. Сондай-ақ отандық тауар өндірушілерді біріктіріп, олардың өнімдерін ішкі нарықта да, сыртқы нарықта да ілгерілету туралы айтылып отыр.

Көрме барысында Түркістан облысының әкімдігі, сауда желілерінің өкілдері мен тауар өндірушілер арасында отандық өнімдерді ілгерілетуге көмектесу мақсатында үш жақты меморандумға қол қойылды.

Бұл меморандумның мақсаты – отандық  тауарларды ілгерілетуде барлық тараптардың бірлескен әрекеті. Атап айтқанда, сауда желілері мен базарларда тауарлар сатқанда отандық өндірілген тауарлар көзге көрінетін және физикалық қолжетімді орындарға, көз деңгейінде орналастырылуы керек.

Сауда комитетінің төрағасы Айдар Әбілдабековтің айтуынша, «Қазақстанда  жасалған» таңбалау белгісі мен жалпы қолдау отандық тауар өндірушілер үшін бөлшек сауда сөрелеріне жол ашпақ.

— Олардың бәсекеге қабілеттілігі артады, сонымен қатар өндірістің дамуына серпін береді және сайып келгенде, олардың өзіндік құнын төмендетуге және өнім сапасының артуына әсер етеді, - деді ол.

Тауарды таңбалауды қолданудың бір артықшылығы – бөлшек және көтерме саудаға бөлек сауда орындарын ұсыну, сонымен қатар отандық тауарларды жарнамалау үшін. Оларға берілетін жеңілдікер, олардың сыртқы нарықта ілгерілеуіне жәрдемдесетінін айта кеткен жөн.