Қазақстанда жарақат алу көрсеткіші төмендеді

Қазақстанда жыл сайын кәсіпорындарда 1500-ден астам жазатайым оқиғаға жол берілсе, оның 200-ге жуығы өліммен аяқталады. Осыған қарамастан, жарақаттар мен өлім-жітім деңгейі төмендеді. Бұл туралы ҚР Еңбек және халықты әлеуметтік қорғау министрлігі хабарлады.

Зардап шеккендердің басым бөлігі тау-кен металлургия кешені кәсіпорындарында – 16,2%, құрылыс саласында – 15%.

386 мыңнан астам жұмысшы зиянды және қауіпті еңбек жағдайларында жұмыс істейді. Әр екінші жұмысшы (46,8%)  шу мен дірілдің жоғары деңгейінде, әрбір үшіншісі (33,2%) газдың ластануы мен жұмыс аймағының шаңдылығы жоғары жағдайында және әрбір алтыншы (16,7%) адам қолайсыз температура жағдайында жұмыс істейді.  Ауыр дене еңбегімен 102,7 мың адам (6,1%) айналысады.

2022 жылы 680 мың қызметкер зиянды еңбек жағдайларында жұмыс істегені үшін түрлі өтемақы алды. Бұл мақсаттарға жұмыс берушілер 207,6 млрд теңге бөлді, бұл 2021 жылмен салыстырғанда 24%-ға артық.

2022 жылдың қорытындысы бойынша қауіпсіздік және еңбекті қорғау саласындағы бұзушылықтар үшін 119 лауазымды тұлға жұмыстан босатылды. Құқық қорғау органдарына жазатайым оқиғалар бойынша 1094 материал жолданып, олар бойынша 192 қылмыстық іс қозғалды.