Қазақстанда тұрғың келсе, тіл үйрен! - Наталья Дементьева

ҚР Парламентінің депутаты Наталья Дементьева ресейліктердің өз елінде ішінара жұмылдыру жарияланғаннан кейін Қазақстанға келуіне қатысты пікірін білдірді.

Inbusiness басылымының хабарлауынша, бұл жағдай депутатты алаңдатуда.

— Бізге де мұндай көші-қон ұнамайды, ресейліктер туристік мақсатпен емес, белгілі бір адамның шешімімен саяхаттауға мәжбүр. Жалпы, ел ішінде бұл жағдайға бейжай қарамайтын адамды табу қиын. Өйткені бұл белгілі бір мағынада моральдық тұрғыдан ыңғайсыздық тудырады, - деді Дементьева.

Ресейліктердің ағыны біраз нәрсеге әсер етті. Біріншіден, бұл үлкен қалаларда тіпті миллион теңгеге дейін жететін жалға берілетін тұрғын үй бағасы. Депутаттан кейбір қазақстандықтардың ақша табу мақсатында азаматтарымызды қуып, «көршілерге» қоныстанып жатқаны туралы ақпаратты қалай қабылдағанын сұрады.

— Иә, өкінішке қарай, осы сәтті өз мүддесіне пайдаланғысы келетіндер бар. Бір жағынан пәтерлерді кімге және қандай сомаға жалға беретінін олардың өздері біледі. Бірақ ойлану керек. Бұл азаматтық мәселесін тудырады. Ақша табу үшін жерлестерін қуып жатандарды түсіне алмаймын. Осы жағдайға қарап, олардың ар-намысы, абыройы қайда қалды деп ойлайсың? – деп ашуланды мәжілісмен.

Сондай-ақ одан Қазақстанға келетін ресейліктерге қандай кеңес беретінін сұрады.

— Мен оларға қонақ екенін ұмытпаңдар дегім келеді. Жергілікті тұрғындардың өзіндік дәстүрі, тұрмысы, дүниеге көзқарасы бар. Біздің өз менталитетіміз бар, былайша айтқанда. Олар біздің осы құндылықтарымызды міндетті түрде құрметтеуге тиіс. Көптеген ресейліктер басқа елдерге транзитпен барады. Ал біздің елде қалғысы келетіндерге айтарым: «Мемлекеттік тілді үйреніңдер». Өйткені, тілге құрмет – елге құрмет! - деп қорытындылады Наталья Дементьева.

Еске салсақ, 21 қыркүйек Ресей президенті Владимир Путин елде жұмылдыру туралы жариялады.