Қазақстанда қасиетті Рамазан айы басталды

Биыл қасиетті Рамазан айы 23 наурызда басталып, 20 сәуірге дейін жалғасады.

Ораза 29 күнге созылады. Ораза айт 21 сәуірге ткра келеді. Сәуірдің 17-нен 18-іне қараған түн – Қадір түні.

Төралқа Мәжілісі мүшелерінің бірауызды шешімімен биылғы пітір садақа мөлшері – 535 теңге болып бекітілді.

Пітір-садақа мөлшері елдегі 2 келі ұнның орташа бағасына орай есептелді. Ұн бағасы Қазақстан мұсылмандары діни басқармасы  қалалық және аудандық филиалдары берген ақпарат негізінде анықталды.

«Ұнның құны Қазақстан мұсылмандары діни басқармасы  қалалық және облыстық бөлімшелері берген ақпарат негізінде анықталды. Пітір-садақа мейіз бағасымен де, құрма бағасымен де берілуі мүмкін. Бұл туралы Бас мүфти Наурызбай қажы Тағанұлы Астанада өткен баспасөз мәслихатында мәлімдеді»  деп жазды ҚМДБ баспасөз хатшысы Ағабек Қонарбайұлы Facebook парақшасында.

Қазақстан мұсылмандары діни басқармасының ресми сайтында Қазақстан қалаларындағы ораза және намаз уақыттарының кестесі ұсынылды. Сондай-ақ сайттан барлық қалалардағы намаз уақытын жүктеп алуға болады.

Рамазанда ауыз бекіткен исі мұсылман баласы өзін ішіп-жеуден ғана шектемей, жаны мен тәнін жамандықтан сақтап, ізгілікке ұмтылады. Іс-әрекетін мұсылманға тән әдеп аясында орындауға тырысады. Өйткені Рамазан – кез келген ізгі амалды риясыз ниетпен жасауға тәрбиелейтін, адамды тақуалыққа үйрететін ай.

Пітір садақаны Рамазан айының бірінші күнінен ораза айт намазына дейін беруге болады.