Қазақстанда екінші 5G жиілігі 93 млрд теңгеге сатылды

Қазақстанда екінші 5G жиілігі 93 млрд теңгеге сатылды, деп хабарлайды ҚР Цифрлық даму, инновациялар және аэроғарыш өнеркәсібі министрлігінің  баспасөз қызметі.

23 желтоқсанда №2 лот бойынша 5G радиожиіліктері аукционындағы сауда-саттық аяқталды Сауда-саттықтың бастапқы сомасы 1,761 млрд теңге болды.

«Қазірдің өзінде сағат 10:00-де ең үлкен - 20 миллиард теңгелік  бастапқы ұсыныс түсті . Төрт сағаттан астам уақыт ішінде сома рекордтық 93,399 миллиард теңгеге дейін өсіп, аукционды аяқтады» деп жазды Цифрлық даму, инновациялар және аэроғарыш өнеркәсібі министрі Бағдат Мусин өзінің Telegram-арнасында.

Хабарланғандай, аукционның жеңімпазы болып «Кселл» АҚ мен «Мобайл Телеком Сервис» ЖШС өкілдері бар консорциум танылды.

«Жеңімпаз тиісті рұқсат берілгеннен кейін 3700-3800 МГц диапазонында 100 МГц иегері болады. Екі лот бойынша аукцион қорытындысымен  республикалық бюджетке бөлінген сома 156 миллиард теңге болды. Бұл қаражат бізге «Қолжетімді интернет»  жаңа ұлттық жобасын жүзеге асыруға көмектеседі» деп жазды  Бағдат Мусин.

Ол жобада үш мыңға жуық ауылды талшықты-оптикалық байланыс желісімен қамтамасыз ету, республикалық және облыстық маңызы бар жолдардың бойына оптика төсеу, БАЖ салу және шалғай және қатынауы қиын ауылдарға электр қуатын тарту қарастырылғанын еске салды.