Қазақстанда ақпараттық доктрина пайда болады

«Қазақстан Республикасының ақпараттық доктринасын бекіту туралы» Жарлыққа Қасым-Жомарт Тоқаев қол қойды. Бұл құжаттың негізгі мақсаты Қазақстанның бірыңғай ақпараттық кеңістігінің тұрақты жұмыс істеуі мен қауіпсіздігін дамыту және қамтамасыз ету.

Жарлық 20 наурызда Ақорда сайтында жарияланды. Онда жаңа ақпараттық саясаттың мақсаттары мен міндеттері жан-жақты сипатталған.

«Ақпараттық саладағы жаңа шындық және ақпараттық қауіпсіздікке төніп тұрған қауіптер мемлекеттік ақпараттық саясатты іске асыру тәсілдерін қайта қарауды, мемлекеттік институттар мен ақпараттық саладағы қоғамдық қатынастардың басқа субъектілері арасындағы қарым-қатынастың жалпы парадигмасын өзгертуді талап етеді. (...) Сондай-ақ ұлттық құндылықтар мен саяси-әлеуметтік дүниетанымның тұтас жүйесін қалыптастыруға сұраныс артып келеді, әсіресе тарихи өзгеріс жағдайында. Осыған байланысты Қазақстан Республикасының алдында жаһандық ақпараттық экожүйенің толыққанды мүшесі ретінде осы саладағы елдің ұлттық мүдделерінің мәнін көрсететін нақты ақпараттық-коммуникациялық императивтер мен құндылық бағдарларды әзірлеу міндеті тұр»  делінген хабарламада.

Доктринаның міндеттері – ақпараттық қауіпсіздік пен елдің идеологиялық егемендігін қамтамасыз ету, заманауи үрдістер мен сын-қатерлерге жауап беретін ақпараттық саясатты құру. Ал оның негізгі қағидаттары сөз бостандығы, ақпаратқа қолжетімділік, дамуға бағдарлану, сенім мен құпиялылық, сондай-ақ ақпараттық қауіпсіздікті қамтамасыз ету болмақ.

Доктрина Қазақстанның аймақтық ақпараттық хабқа айналуын да көздейді. Құжатта еліміздің ақпараттық кеңістігі қалай дамитыны, ақпараттық саясаттың жетілдіріліп, отандық контент сапасының жақсаратыны жан-жақты сипатталған.

Жарлықтың толық нұсқасымен Ақорда сайтынан танысуға болады.