Қазақстанда әуе билеттерінің құны өсті

Биылғы жылдың қаңтар-шілде айларының қорытындысы бойынша авиакомпаниялардың кірістері 189,2 млрд теңгеден 276,8 млрд теңгеге өсті.

finprom.kz сарапшыларының мәліметінше, кірістердің негізгі бөлігі жолаушыларды тасымалдау есебінен алынды. 6,2 млрд теңге жүк тасымалдаудан түскен кіріс көлемі. Экипажымен бірге көлік құралдарын жалға беруден түскен табыс 3 млрд теңге болды.

2022 жылғы қаңтар-шілдеде ұшаққа мінген жолаушылар саны 5,8 млн адамды құрады. Бұл есеп бір жыл бұрынғы осы кезеңмен салыстырғанда 12,8%-ға артық.

Өңірлік бөліністе жолаушылар тасымалының басым бөлігі Алматыға тиесілі: 4 млн жолаушы.

2022 жылғы шілде айының қорытындысы бойынша жолаушыларға арналған авиакомпаниялар қызметтерінің бағасы бір жылда 26,6%-ға өсті.

Ұшақ билетінің қымбат бағасы Түркістан (56,8%-ға), Жамбыл (46,7%-ға) және Шығыс Қазақстан (44,5%-ға) облыстарында байқалды.

Солтүстік Қазақстан облысында баға өзгеріссіз қалды. Тағы үш өңірде қызмет арзандады: Ақмола облысында — 8,7%, Қызылорда облысында — 8,8%, Павлодар облысында — 17,7%.