Қазақстанда адал бизнес жасау кез келген адам үшін тиімді және қауіпсіз болуы керек —Тоқаев

Қазақстан Президенті Қасым-Жомарт Тоқаев Ақорда резиденциясында ірі бизнес өкілдерімен кездесті. Ол еліміздің одан әрі дамуындағы отандық кәсіпкерліктің рөлін талқылау мақсатында ұйымдастырылды. Президент мемлекет экономикадағы жетекші рөлден бас тартып, кәсіпкерлік істерге араласпауы керек деді.

— Мен Қазақстан халқына Жолдауымда біздің экономикалық саясатымыздың негізгі мақсаты – бүкіл елдің әл-ауқатының сапалы және инклюзивті өсуінің өзгермейтіндігін атап өттім. Бұл мақсатқа еркін және тиімді нарықтық экономиканы құру арқылы ғана қол жеткізуге болады. Мемлекеттің экономикадағы жетекші рөлі, сонымен қатар, мемлекеттің кәсіпкерлік істерге араласуы өткен күннің еншісінде қалуы керек және  қала бермек. Мемлекеттің міндеті – заңға бағынатын бизнесті ел ішінде де, халықаралық нарықта да ілгерілету, – деді Мемлекет басшысы.

Оның айтуынша, экономиканы монополиясыздандыру және нарықты кеңейту жұмысы жалғасады. Тоқаевтың пікірінше, бизнеске таныстық пен байланыстар әсер етпеуі керек.

— Бәсекелестік өрісі  теңестіріледі - енді жекелендірілген артықшылықтар болмайды. Қазақстанда адал кәсіппен айналысу кез келген адам үшін тиімді және қауіпсіз болуы керек. Мемлекеттік аппараттағы байланыстарға және оның тарапынан қамқорлыққа қарамастан. Бұл негізгі параметр. Біз шағын және орта бизнесті дамытамыз, кәсіпкерлердің жаңа толқынын тәрбиелейміз, тың идеяларды, жаңа мағыналарды дамытуға ынталандырамыз. Бұл ретте мемлекет ірі, қалыптасқан бизнесті қолдаудан бас тартпайды. Керісінше, сізден біз ең алдымен Әділетті Қазақстанды құруға сындарлы қатысуды күтеміз, - деп атап көрсетті Мемлекет басшысы.

Алға қойған ауқымды мақсаттарға бірқатар реформалар арқылы қол жеткізу керек. Атап айтқанда, бұл салық саясаты мен әкімшілікті қозғайды.

— 2024 жылы жаңа Салық кодексі күшіне енеді. Оның дамуына бизнес тікелей қатысады. Бұл менің Үкіметке тапсырмам.

2024 жылдан бастап «жаңа жолмен реттеу» іске қосылады. Бұл бизнесті шамадан тыс әкімшілік қысымнан құтқарады. Мемлекеттік сатып алу тәсілдері мен мемлекеттік-жекеменшік әріптестік моделі толығымен қайта қаралады, жер қойнауын пайдалану туралы заңнама жетілдіріледі, – деді Қасым-Жомарт Тоқаев.

Бірақ бизнес халықтың игілігі үшін де көп жұмыс істеуі керек, деп санайды президент. Ол кәсіпкерлерді қоғамды толғандырып жүрген әлеуметтік мәселелерді шешуден шет қалмауға шақырды.

— Адам капиталына салынған инвестицияның маңызы кем емес: заманауи балабақшалар, жайлы мектептер, ауруханалар, мықты университеттер салу, туризмді дамыту. Сондай-ақ, біз сіздердің тарапыңыздан қайырымдылық шараларына сенеміз. Қазір елімізде мектептердің, студенттер жатақханаларының, жастарға арналған спорттық ғимараттардың жетіспеушілігі өткір мәселе болып тұр. Сіздердің көмектеріңіз ел үшін үлкен маңызға ие болар еді, - деді Мемлекет басшысы.

Соңында Тоқаев мемлекет пен бизнес арасындағы сындарлы диалогты жалғастыру маңызды екенін атап өтті.