Қазақстанда 13,4 мың шетелдік азамат жұмыс істейді

Негізг еңбек мигранттарының басым бөлігі Қытайдан келгендер.

2023 жылғы 1 наурыздағы жағдай бойынша жергілікті атқарушы органдардың рұқсаттары бойынша Қазақстанда 13 403 шетел азаматы жұмыс істейді, деп хабарлайды ҚР Еңбек және халықты әлеуметтік қорғау министрлігінің баспасөз қызметі.

Шетелдік жұмыс күшін тартуға берілген рұқсаттардың ішінде келесі санаттар бар: басшылар мен олардың орынбасарларына – 565 рұқсат (бірінші санат), құрылымдық бөлімшелердің басшыларына – 2 966 рұқсат (екінші санат). Тартылған жұмыс күшінің негізгі бөлігін үшінші (мамандар) және төртінші (білікті жұмысшылар) санаттары – тиісінше 7199 және 883 адам құрайды. Сондай-ақ маусымдық жұмысқа 391 адам, корпоративтік ауысым аясында 1399 адам тартылды.

Қазір Қазақстанда жұмыс берушілерге шетелдік жұмыс күшін тартуға рұқсат пайдаланатын 1640 жұмыс беруші бар. Оларда 409 мыңнан астам Қазақстан азаматы жұмыс істейді, бұл жалпы қызметкерлер санының 96 пайызын құрайды.

Экономикалық қызмет түрлері бойынша құрылыс саласында ең көп жұмыс істейтіндер – 5 494 адам  (41%); тау-кен өнеркәсібі және карьерлерді қазу –  (11%) 1 455 адам; кәсіптік, ғылыми-техникалық қызмет – 995 адам (8%); өңдеу өнеркәсібі – 889 адам (7%); ауыл, орман және балық шаруашылығы – 641 адам (5%).

Еңбек мигранттарының негізгі шыққан елдері: Қытай – 3411 адам, Үндістан – 1685 адам, Түркия – 1523 адам, Ұлыбритания – 1073 адам, Өзбекстан – 769 адам.

Еске салайық, ішкі еңбек нарығын қорғау мақсатында Қазақстан Республикасының Еңбек және халықты әлеуметтік қорғау министрлігі жыл сайын республикаға шетелдік мамандарды тартуға квота белгілеп, бөледі. Биыл да ЕХӘҚМ шетелдік жұмыс күшін тартуға – 22 226 бірлік (0,24%) квота белгіледі.