Қазақстан Украинадағы «референдумдарды» мойындамайды

Украинада мойындалмаған ДХР мен ЛХР, сондай-ақ Херсон және Запорожье облыстарында Ресейге қосылу туралы референдум өтіп жатыр.

Сыртқы істер министрлігінің ресми өкілі Айбек Смадияров өзін-өзі жариялаған Донецк және Луганск халық республикалары (Қазақстанда мойындалмаған), Херсон және Запорожье облыстарының аумақтарында өтіп жатқан Ресейге қосылу референдумы туралы түсініктеме берді.

– Қазақстан мемлекеттердің аумақтық тұтастығы, олардың егемендік теңдігі және бейбіт қатар өмір сүру қағидаттарын қолдайды. Біздің президентіміз таяуда БҰҰ мінберінде сөйлеген сөзінде халықаралық құқық қағидатын бұлжытпай сақтаудың маңыздылығын бірнеше рет, соның ішінде БҰҰ мінберінде сөйлеген сөзінде осы дүниежүзілік әмбебап ұйымның Жарғысына негізделгенін нақты атап өтті. Жарғы БҰҰ-ға мүше мемлекеттердің бейбітшілікті сақтау және мемлекеттердің аумақтық тұтастығын құрметтеу жауапкершілігі туралы айтады, – деді ол.

– Сонымен қатар, еліміз өңірлік деңгейде де, жаһандық деңгейде де тұрақтылықты сақтауды ең маңызды міндет деп санайды, – деп түйіндеді ол.

Сыртқы істер министрлігінің өкілі еліміздің саяси диалог орнатуға жан-жақты көмек көрсетуге дайын екенін баса айтты.

Дауыс беру 23-27 қыркүйек аралығында өтеді. Референдум бастамашыларының пікірінше, мұндай шешім мойындалмаған Донбас республикаларының (өзін-өзі жариялаған ДХР мен ЛХР) аумақтарының қауіпсіздігін қамтамасыз етеді және «тарихи әділеттілікті қалпына келтіреді». Украинаның Донецк, Луганск, Запорожье және Херсон облыстарының аумағы қазір ішінара Ресей Федерациясының әскерилері мен ресейшіл қарулы топтардың бақылауында.