Қазақстан Швейцария нарығына экспорттық тауарларды жеткізуді ұлғайтады

Қазақстан Швейцария нарығына экспорттық тауарларды жеткізуді 500 млн долларға ұлғайтуға дайын, деп хабарлайды ҚР Сауда және интеграция министрлігінің баспасөз қызметі.

«Біз экспортқа дайын тауарларымызды сараптадық және ағымдағы тізімді құны 546,4 миллион доллар болатын тағы да 90 тауар позициясымен кеңейтуге дайынбыз. Швейцариялық тауарлардың жоғары сапасын ескере отырып, біз премиум сегменттегі өнімдерді ұсынуға дайынбыз: уылдырық, балық, бал , шарап және арақ өнімдері. Біз Еурокомиссиямен белсенді жұмыс істеп жатырмыз, балық өнімдерін экспорттау келісілді, бал әзірленуде. Жұмыс топтарында біз Еуроодақ нарығына қазақстандық уылдырықтың жеткізілімін сертификаттау мәселесіне бастамашылық жасадық», - деді министр Серік Жұманғарин сауда-экономикалық ынтымақтастық жөніндегі Қазақстан-Швейцария комиссиясының 11-ші отырысында.

Швейцария бизнесін Philip Morris International (темекі өнеркәсібі), Glencore International (MMC), Roche Holding (фама), SGS (сертификаттау) немесе ABB (электротехника), Bühler Group (машина жасау) және т.б. ұсынады.

Елімізде швейцариялық капиталдың қатысуымен барлығы 300-ге жуық компания жұмыс істейді.

2022 жылдың қорытындысы бойынша екі ел арасындағы тауар айналымы 1,4 млрд долларды құрады.

Кездесу барысында тараптар өзара мүдделі екіжақты ынтымақтастық мәселелерін талқылады: сауда және инвестиция, бірлескен жобалар, ауыл шаруашылығы, авиация, энергетика, техникалық реттеу, стандарттау және метрология, білім және ғылым, зияткерлік меншік салаларындағы ынтымақтастық, сондай-ақ венчурлық инвестицияларды тарту.

Тараптар Швейцария мен Қазақстан нарығына жеткізілуі мүмкін әлеуетті экспорттық тауарлардың тізбесімен алмасуға және екі елдің іскер топтары арасында серіктестер табу және жеткізілімдерді орнату бойынша тұрақты негізде жұмыс істеуге келісті.

Швейцария Нидерланды мен АҚШ-тан кейін Қазақстандағы ең ірі инвесторлардың үштігіне кіреді. 2005 жылдан бері Швейцарияның Қазақстанға құйған тікелей инвестициясының көлемі 31 миллиард доллардан асты. Екі ел арасындағы тауар айналымы 2022 жылы 1,4 миллиард долларға жетіп, 2021 жылмен салыстырғанда (1,3 миллиард доллар) 6,4 пайызға артқан.