Қазақстан сайлауда онлайн дауыс беру платформасын жасамақшы

ҚР Орталық сайлау комиссиясының отырысында оның хатшысы Анастасия Щегорцова азаматтың электрондық цифрлық қолтаңбасын пайдалана отырып, онлайн дауыс беру механизмін енгізу мәселесі пысықталып жатқанын айтты. Бірақ өкінішке қарай бұл сайлауда онлайн платформа дайын болмайды.

Щегорцованың айтуынша, мұндай ұсынысты «Qamqor plus» мүгедектер қоғамдық бірлестігінің төрағасы Нияз Сүндеталиев айтқан.

- Азаматтың электрондық цифрлық қолтаңбасын пайдалана отырып, онлайн дауыс беру механизмін әзірлеу және енгізу ұсынысы зерттелуде және заңнамаға өзгерістер енгізуді талап етеді, - деді ол.

Сонымен қатар, жиында мүмкіндігі шектеулі жандардың сайлау құқықтарын жүзеге асыру шаралары талқыланды.

- ОСК мүгедектердің сайлау құқықтарын қамтамасыз ету бойынша жұмыс тобы мүшелерінен, мүдделі мемлекеттік органдар мен қоғамдық бірлестіктерден түскен барлық ұсыныстарды зерделеді. Олардың кейбіреулері дауыс беретін үй-жайларды жабдықтау мәселелерін егжей-тегжейлі көрсетуге қатысты (қолыңызға чип қоюға болатын көрсеткіші бар дауыстық бағдаршамдар; сайлау учаскесінің орналасқан жеріне, кіру/шығуға арналған жарық индикаторлары), сондай-ақ мүмкіндігі шектеулі азаматтардың ымдау тілі арқылы сайлау құқықтарын қамтамасыз ету жұмыстарына волонтерлар мен аудармашыларды тарту, - деді Орталық сайлау комиссиясының хатшысы.

Көру қабілеті бұзылған адамдарға Брайль шрифтімен трафарет жасау ұсынысы да назарға алынды.