Қазақстан президенті Қасым-Жомарт Тоқаевты ұлықтау рәсімі өтті

Қасым-Жомарт Тоқаев ресми түрде жеті жылдық мерзімге президент қызметіне кірісті, деп хабарлайды Ақорда.

Тоқаевты ұлықтау рәсімі сенбі күні Тәуелсіздік сарайында өтті. Сайланған президент Қазақстан халқына Конституцияға ант беріп, ел туының алдында тағзым етті.

Тоқаевтың қызметіне кірісуінің салтанатты рәсімі еліміздің саяси элитасы, жұртшылығы, бұқаралық ақпарат құралдары, Жоғарғы Сот, орталық сайлау комиссиясы және басқа да құрылымдар өкілдерінің қатысуымен өтті. Ұлықтау рәсіміне барлығы 2,5 мыңға жуық адам қатысты.

Еске салайық, Тоқаев 20 қарашада өткен сайлауда 81,31 пайыз дауыспен жеңіске жеткен болатын. Конституцияға енгізілген соңғы өзгерістерге байланысты ол жеті жыл билік жүргізеді, ал одан кейінгі барлық президенттер дәл осындай бір мерзімге ғана сайланады.