Қазақстан одақтық мемлекеттер құруға немесе оған кіруге ниетті емес

Мәскеуде өткен экономикалық форумда мемлекет басшысы Тоқаевтың сөйлеген сөзіне президенттің баспасөз хатшысы Руслан Желдібай түсініктеме берді.

Бұл туралы Руслан Желдібай өзінің Facebook парақшасында хабарлады.

Ол Қазақстанның одақтық мемлекеттер құру немесе оған кіру ниеті жоқ екенін, бірақ мақсаты мүлде басқа екі интеграциялық жоба аясындағы бастамаларды бөлуді жақтайтынын айтты.

«Өздеріңізге мәлім, Мемлекет басшысы жақында Мәскеу қаласында өткен II Еуразиялық экономикалық форумға қатысты.

Президент жиын барысында бүгінде сарапшылар қауымдастығы кеңінен талқылап жатқан бірқатар мәлімдеме жасады.

ЕАЭО аясындағы интеграция тек қана экономикалық сипатта ғана жүруі керек. Бұл – Президенттің негізгі ұстанымы. Оның шеңберінен шығу ұйымның жарғылық құжаттарының мақсаттарына, принциптері мен міндеттеріне қайшы келеді» делінген хабарламада.

Президент Тоқаевтың сөзінше экономикалық интеграция – түпкі мақсат емес, ол экономиканы дамытудың және халықтарымыздың әл-ауқатын арттырудың негізгі құралдарының бірі.

Сонымен қатар түрлі деңгейдегі интеграция мәселесі қозғалды. Бүгінде ЕАЭО-ның екі мүшесі – Ресей мен Беларусь өзара ықпалдастықтың жоғары деңгейіне шықты. Бұл – ерекше жағдай. Мемлекет басшысының пайымынша, шын мәнінде, бір халық және бір мемлекет туралы сөз болып отыр. Осы ретте мүлде басқа мақсаттарды көздеген екі түрлі интеграциялық жоба шеңберіндегі бастамалардың ара-жігін ажырату аса маңызды.

Біздің елімізге келетін болсақ, Қазақстан қандай да бір одақтас мемлекеттер құруға немесе олардың құрамына кіруге ниетті емес және оны жоспарлап отырған жоқ делінген хабарламада.