Қазақстан Ресей азаматтарын қайтара ма?

Ресейдегі ішінара жұмылдырудан қашқан азаматтарға халықаралық іздеу жарияланды. Олар «өз еліне қайтарылатын бола ма?» деген сұраққа ішкі істер министрі Марат Ахметжанов жауап берді.

Министрдің ақпаратына сәйкес, екі ел арасында экстрадациялау туралы келісім бар. Ол қылмыскерлер тізіміндегі азаматтарға қатысты қолданылатын шара. Ал, мобилизациядан қашқан азаматтарды Ресей Федерациясы қылмыскерлер тізіміне енгізсе, Қазақстан ол азаматтарды экстрадациялауы мүмкін.

- Әңгіме мобилизация туралы емес. Мен мобилизация туралы емес, тіркелген, санкцияланған қылмыстық құқық бұзушылықтар туралы және халықаралық іздеуге жарияланған қылмыскерлер туралы айтып тұрмын. Әскери комиссариаттар іздесе, бұл оларды экстрадициялауға заңды негіз болып табылмайды. 

Егер бұл қылмыстық құқық бұзушылық болса, Ресей тарапынан да, біздің тарапымыздан да Минск конвенциясы аясында және біздің парламент ратификациялаған құқықтық көмек көрсету бойынша да ұстап беру жүргізілуде, - деді ішкі істер министрі Марат Ахметжанов.

Сонымен қатар, ішкі істер министрі Ресейде ішінара жұмылдыру жарияланғаннан бері елге 98 мың ресейлік кіргенін атап өтті.