Қазақстан мен Шыңжаң кәсіпкерлері 475 млн долларға келісімшартқа отырды

Үрімжі қаласында кәсіпкерлер форумы өтіп, қазақстандық кәсіпкерлер өз өнімдерін ұсынды.

Қазақстан мен Қытайдың Шыңжаң-Ұйғыр автономиялық аймағының кәсіпкерлері жалпы сомасы 475 млн долларды құрайтын оннан астам коммерциялық құжатқа қол қойды, деп хабарлайды Хабар 24 .

Қазақстан тарапынан Қазақстанның Бейжіңдегі Елшілігі мен «Қазақинвест» өкілдігі ұйымдастырушылар болды. Жасалған келісім-шарттарға Қазақстаннан жемістер мен көкөністерді экспорттау, автоклав блоктарын шығару және ақылды жылыжай жобасы кіреді. Гибридтік форматта өткен шараға компания мен сауда-экономикалық құрылымдардың 130-ға жуық өкілі қатысты. Тағы 15 млн адам тікелей эфирде көрді.

— Бүгін қазақстандық павильонда біз қытайлық алты ірі компаниямен бағасы жағынан да, көлемі жағынан да келісімге келдік. Жұмысты қазан айында бастауды жоспарлап отырмыз. Оған қоса дайын өнімдеріміз бар. Ол бойынша біз бірқатар компаниялармен де келісімге келдік,- дейді XINJIANG ORGANIC FOOD IMPORT EXPORT CO. директоры Қанат Бектембаев.

Биылғы жылы шараға Еуразиялық аймақтың 32 елінен үш мыңға жуық кәсіпорын қатысты. Бұл ретте Қазақстан көрменің ең үлкен павильоны бар құрметті қонақ ретінде ұсынылып отыр. Еліміздің тамақ және жеңіл өнеркәсібінің 20 кәсіпорны өсімдік майы, бал, кондитерлік және макарон өнімдері, ұн, шырындар сияқты 140-тан астам өнім түрін ұсынды.

— Қазақстандық өнімдер негізінен азық-түлік тауарларымен ұсынылған. Мұның бәрі жергілікті тұрғындар жақсы көреді. Мысалы, ұн, сусындар, шырындар. Көптеген ЭКСПО келушілері қазақстандық павильонға қызығушылық танытып, Қазақстаннан өнім алуға ниет білдірді. Бұл көрме Қазақстан мен Қытай арасындағы сауда-экономикалық ынтымақтастықты жаңа деңгейге көтеруге септігін тигізеді деп үміттенеміз,- деді «Қытай-Еуразия» ЭКСПО хатшылығы басшысының орынбасары Чжан Шуцзюнь.

Өткен аптада ғана Қытай төрағасы Си Цзиньпин Қазақстанға мемлекеттік сапармен келді. Екі мемлекет басшылары ынтымақтастық туралы 10 құжатқа қол қойды. Қазақстандық тарап үшін бұл келісімдер экспорт пен ішкі Қытай нарығына шығуды жеңілдетеді, ал Бейжің Еуропа елдерімен сауданың баламалы бағытын алады.

Қытай тарапы үшін бұл келісімдер әсіресе қызықты, өйткені Украинадағы соғыс логистикалық байланыстарды айтарлықтай нашарлатты. Транскаспий дәлізі арқылы Қазақстан бойынша тасымалдау көлемі өткен жылдың кезеңімен салыстырғанда 2,5 есеге өсті: 1,3 млн тонна жүк тасымалданды.