Қазақстан мен Өзбекстан шекарасындағы кеденшілер күшейтілген жұмыс режиміне көшті

Қазақстан мен Өзбекстан шекарасындағы кеденшілер күшейтілген жұмыс режиміне көшті, деп хабарлады Мемлекеттік кірістер комитетінің баспасөз қызметі.

«Өткізу қабілетін арттыру мақсатында Қазақстан мен Өзбекстанның мемлекеттік органдары келісім бойынша күшейтілген режимге көшті. Осыған байланысты бақылау-өткізу бекеттеріндегі жинақталған заттар тез арада түсіріледі», - деді комитеттегілер.

20 сәуірде ауа райының қолайсыздығына байланысты шекарада көліктер жиналып, Өзбекстанға өту үшін 200-250 көлік күтіп тұрғаны хабарланды.

Түркістан облысындағы «Қапланбек» кеден бекеті қайта жөндеуге жабылды. 2023 жылғы 15 ақпаннан бастап «Қазығұрт» (ҚР) – «С. Наджимов» (Өз) және «Атамекен» (ҚР) – «Гүлістан» (Өз) өткізу бекеті жұмысын тоқтатқан болатын.

«Айта кетейік, шекаралық өткізу пункттерінің өткізу қабілеті төмендемеген. «Қазығұрт» және «Атамекен» кеден бекеттері екі бағытта (импорт/экспорт) орта есеппен тәулігіне 350-400 жүк көлігі, жаңартылған «Б.Қонысбаев»бекеті арқылы - 1000-нан астам жүк көлігі» өтеді», - деді комитет.

Жүргізушілерге Түркістан облысы бойынша ҚМД  интернет-ресурстарында (trk.kgd.gov.kz) бекет жүктемесі мен ағымдағы жол жүру тәртібін қадағалау ұсынылды.