Қазақстан мен АҚШ өкілдері  Смайылов пен Розенблюм ынтымақтастықты талқылады

Қазақстан АҚШ-ты екіжақты және көпжақты форматтағы стратегиялық серіктес деп санайды, деді Смайылов.

Қазақстан Америка Құрама Штаттарымен ынтымақтастықты тереңдетуге және нығайтуға бел байлауда. Бұл туралы Қазақстан Республикасының Премьер-Министрі Әлихан Смайылов АҚШ-тың еліміздегі Елшісі Дэниел Розенблюммен кездесуінде айтты. Оның айтуынша, бүгінде Қазақстанда 900-ден астам бірлескен кәсіпорын жұмыс істейді. Ал елдер арасындағы тауар айналымы өткен жылы 40 пайызға дерлік артып, 3,1 миллиард долларды құрады, ал америкалық инвестицияның ағыны екі есеге жуық өсіп, 5,1 миллиард доллардан асты. Бұл ретте Қазақстан сауда көлемін ұлғайту әлеуетін көріп отыр және 90 тауар позициясының экспортын 800 миллион долларға арттыруға дайын.

«Бұрынғыдай біз кең ауқымды өзара іс-қимылдың барлық күн тәртібі бойынша Америка Құрама Штаттарымен өзара тиімді ынтымақтастықты одан әрі тереңдетуге және нығайтуға бел байладық», - деді Әлихан Смайылов.

Розенблюм ортақ мүддеге негізделген Қазақстан-Америка қарым-қатынастарын дамытудың үлкен әлеуетін көретіндігін жеткізді. Сондай-ақ ол әр түрлі секторларды ұсынатын 20-ға жуық америкалық компания осы жазда Қазақстанға іскерлік миссия құрып, келуді жоспарлап отырғанын түсіндірді.

«Біз инвестициялық көрсеткіштерді нығайтып, екіжақты тауар айналымын арттырғымыз келеді. АҚШ компаниялары Қазақстандағы әртүрлі салалардағы қызметін кеңейтуге мүдделі. Бұл тау-кен металлургия кешеніне, ауыл шаруашылығына, денсаулық сақтау саласына, ақпараттық-коммуникациялық және жасыл технологияларға, сондай-ақ көлік саласына қатысты», - деді Дэниел Розенблюм.

Кездесу қорытындысы бойынша тараптар ынтымақтастықтың барлық өзара тиімді бағыттары бойынша белсенді байланыстарды сақтауға дайын екендіктерін растады.