Қазақстан ЕО-пен өзара сауданы әртараптандыруға мүдделі – Әлихан Смайылов

Қазақстан мен Еуропалық Одақ арасындағы сауда, инвестиция, энергетика, көлік және логистика салаларындағы ынтымақтастықты нығайту мәселелері талқыланды.

Бұл туралы Премьер-Министр Әлихан Смайылов пен Еуропалық комиссияның вице-президенті Марос Шефчовичтің кездесуінде белгілі болды. Кездесу барысындағы талқылаулар туралы ақпаратты ҚР Премьер-Министрінің баспасөз қызметі таратты.

Премьер-Министр Қазақстанның Еуропалық Одақпен инвестициялық серіктестікті одан әрі тереңдетуге және өзара сауданы әртараптандыруға мүдделі екенін атап өтті. Сонымен қатар, соңғы жылдары маңызды шикізат саласындағы ынтымақтастықтың маңыздылығы арта түскенін мәлімдеді.

Әлихан Смайылов өткен жылы COP-27 конференциясы аясында Еурокомиссия басшысы Урсула фон дер Лейенмен бірге осы бағыттағы ынтымақтастық туралы меморандумға қол қойылғанын еске салды. Бірнеше апта бұрын Алматыда Еуропалық комиссияның вице-президенті Валдис Домбровскиспен осы Меморандумды жүзеге асыру бойынша жол карталарымен алмасу өтті.

«Құжат экономиканың нақты секторларындағы әріптестікті нығайту бойынша практикалық шараларды көздейді, оның негізгі элементі жасыл технологияларды енгізу болып отыр. Бұл осы саладағы ортақ мақсаттарымызды жүзеге асыруға қосымша серпін беретіні сөзсіз», - деді Премьер-Министр.

Марош Сефчович өз тарапынан Еуропалық Одақтың бұрын қол жеткізілген барлық уағдаластықтарды іс жүзінде жүзеге асыруды жалғастыруға дайын екенін атап өтті.

«Менің бұл сапарым біздің Еуропалық Одақтағы Қазақстанды аса маңызды стратегиялық серіктес ретінде көретінімізді растайды. Біз өзара тауар айналымын арттыруға қуаныштымыз және сіздің елдегі ең ірі инвесторлардың бірі болғанымызды мақтан тұтамыз. Менің сапарым да сіздердің министрлеріңізбен кездесулердің барлығы да сәтті өтті. Біз бірлесіп жұмыс істей алатын ортақ жобаларды талқыладық. Бұдан да тығыз ынтымақтастықты қалай орнатуға қатысты ортақ мүдде күн тәртібіне қойылды», - деді Марош Шефчович.