Қазақстан БРИКС+ отырысына қатысты

Қазақстан БРИКС-ке кіруге мүдделі, бұл туралы  Сыртқы істер министрінің орынбасары Омаров мәлімдеді.

БРИКС+ отырысы Оңтүстік Африканың Кейптаун қаласында өтті. Оған қауымдастықтың тұрақты мүшелері мен «БРИКС достары» деп аталатын елдер қатысты, олардың арасында Қазақстан да болды.

Қазақстан форумға АӨСШК-нің қазіргі төрағасы және ШЫҰ-ның болашақ төрағасы ретінде шақырылды. ҚР Сыртқы істер министрлігі хабарлағандай, министрлер форумы «Өзара жеделдетілген өсуді, тұрақты дамуды және инклюзивті көпжақтылықты қамтамасыз ету үшін ынтымақтастықтан ұжымдық әрекетке көшу» ұранымен өтті.

Онда Қазақстан Республикасы Сыртқы істер министрінің бірінші орынбасары Қайрат Омаров сөз сөйледі. Ол қазіргі заманның өзекті мәселелерін талқылаудың тиімді алаңына айналған БРИКС-ке Қазақстанның қосылуға мүдделі екенін түсіндірді.

«Қазақстандық дипломат форумға қатысушылардың назарын халықаралық құқық қағидаттары мен БҰҰ Жарғысына негізделген БРИКС, АӨСШК және ШЫҰ мақсаттары, міндеттері мен қағидаттарының синергетикасына аударды. Ол Қазақстан мен БРИКС-ке мүше елдер арасында сауда-экономикалық ынтымақтастықтың жоғары деңгейіне қол жеткізілгенін атап өтті. Оған дәлел – Қазақстанның осы бірлестік мемлекеттерімен 2022 жылы 50 миллиард доллардан асқан жалпы тауар айналымына қол жеткізуі» делінген министрлік таратқан хабарламада.

Айта кетейік, БРИКС-ке Бразилия, Ресей, Үндістан, Қытай және Оңтүстік Африка елдері кіреді. Бұл жолы арнайы шақырылған елдер – «БРИКС достары» – Қазақстан, Аргентина, Бангладеш, Бурунди, Габон, ДКР, Египет, Иран, Индонезия, Комор аралдары, БАӘ, Сауд Арабиясы, Уругвай.