Қазақстан ауылындағы қазандықта жарылыс болды - жұмысшы қаза тапты

Жетісу облысының Көксу ауданында бүгін таңертең қазандықта жарылыс болды.

Бүгін, 1 сәуір күні таңғы сағат 8-де Көксу ауданы, Қазақстан ауылында жалпы ауданы 22 шаршы метр қазандық жарылған, деп хабарлайды Orda.kz тілшісі.

Бұл ақпаратты Көксу ауданының әкімдігі растап отыр. Апат салдарынан бір жұмысшы қаза тапты. Қазіргі уақытта жарылыс қайталанады деген қауіп жоқ. Оқиғаның себеп-салдары анықталуда.

Көксу ауданының әкімі Марлен Көлбаев Orda.kz тілшісіне телефон арқылы марқұмның отбасына барлық қажетті көмек көрсетілетінін айтты. Жерлеуді ұйымдастыру және басқа да шығындарды жергілікті билік өз мойнына алады.

Авторы: Азат Жұмаханов