Қазақстан Ауғанстан халқына үздіксіз көмек көрсету жөніндегі кеңеске қатысты

Қазақстан Ауғанстан халқына үздіксіз көмек көрсету жөніндегі кеңеске қатысты, деп хабарлады Сыртқы істер министрлігі.

«Еуроодақ астанасында Орталық Азия мен Еуропалық Одақ мемлекеттерінің Ауғанстан бойынша арнайы өкілдерінің үшінші кездесуі өтті. Іс-шараның күн тәртібінде Ауғанстандағы ағымдағы жағдай контекстіндегі аймақтық қауіпсіздікті қамтамасыз ету мәселелеріне шолу және Ауғанстан халқына үздіксіз көмек көрсету бойынша тараптардың ынтымақтастығы қарастырылды» делінген хабарламада.

Тараптар Ауғанстандағы әйелдер құқығының нашарлауына алаңдаушылық білдірді.

«Ауғанстанда ұзақ мерзімді тұрақтылық орнатудағы және ауған халқына халықаралық гуманитарлық көмекті тиімді көрсетудегі Орталық Азия елдері рөлінің артуы ерекше атап өтілді» делінген ақпаратта.

Біздің еліміздің атынан Сыртқы істер министрлігінің Ерекше тапсырмалар жөніндегі елшісі Талғат Қалиев қатысты.

Бұл тұрғыда қазақстандық ауыл шаруашылығы кәсіпорындарының БҰҰ-ның Дүниежүзілік азық-түлік бағдарламасымен өзара іс-қимыл тәжірибесі атап өтілді. Мәселен, 2022 жылдың бірінші жартыжылдығында Ауғанстанға 456 мың тонна қазақстандық ұн жеткізілді.

«Отандық жоғары оқу орындарының ЕО қаржыландыратын және БҰҰДБ жүзеге асыратын Қазақстан, Қырғызстан және Өзбекстандағы ауған студенттеріне арналған білім беру бағдарламасына белсенді түрде қатысатыны расталды» деп хабарлады СІМ.