Қазақстан алты айға мал экспортына шектеу қойды

Қазақстан елден ірі және уақ малды экспорттауға сандық шектеулер енгізді, деп хабарлайды ҚР Қаржы министрлігінің Мемлекеттік кірістер комитеті.

«2023 жылғы 23 маусымнан бастап Қазақстан Республикасы аумағынан 60 мың бас бұқа, 120 мың бас  тірі қой мен ешкі, сондай-ақ  ірі қара малды алты ай мерзімге Қазақстан Республикасының аумағынан шығаруға сандық шектеулер енгізілді»  делінген жұма күні хабарламада.

Бұл шара «Ауыл шаруашылығы жануарларын Қазақстан Республикасы аумағынан әкетудің кейбір мәселелері туралы» ҚР Ауыл шаруашылығы министрінің 2023 жылғы 5 маусымдағы № 216 бұйрығымен негізделген.

«Жоғарыда аталған бұйрыққа сәйкес бұқалар мен қошқарларды Қазақстан Республикасы аумағынан әкету бекітілген ветеринарлық құжаттарды беру ережелеріне және олардың бланкілеріне қойылатын талаптарға сәйкес берілген ветеринарлық сертификат болған жағдайда ғана жүзеге асырылады. Қазақстан Республикасы Ауыл шаруашылығы министрінің 2015 жылғы 21 мамырдағы No 7-1/453 бұйрығы» делінген баспасөз хабарламасында.

Сондай-ақ, 2023 жылғы 30 маусымнан бастап Қазақстан аумағынан ірі және уақ малды асыл тұқымды малдарды экспорттауға тыйым салынғаны хабарланды.