«Қазақмыс» Путиннің досы олигарх Ротенбергке сатылады

Қазақстандағы ең бай олигарх, «Қазақмыс корпорациясы» жауапкершілігі шектеулі серіктестігінің 70% үлесін ұстап отырған Владимир Ким осы үлесін сатпақшы. 

Бұл туралы Nege.kz дереккөздерге сілтеме жасап хабарлайды.

«Қазақмысты» сату бойынша Ресей президенті Владимир Путиннің жақын достары олигарх-ағайынды Ротенбергтермен келіссөздер өтті. Бірақ оның нәтижесі әзірге белгісіз.

«Компанияны 2006 жылдан бері, яғни 16 жыл бойы басқарған екінші акционер (акциялар үлесі 30%) Эдуард Огай орнынан кетті. Былтырғы пайдасы триллион теңгеден асып кеткен алпауытты басқаруға 1989 жылы туған жас маман Нұрахмет Нұриев тағайындалды.

Акционерлер Нұриевті транзиттік фигура ретінде қойып отырғаны түсінікті. Бәрі тыныш болса, Огай орнынан ешқайда кетпейтін еді» делінген хабарламада.

«Ким мен Огайға Жаңа Қазақстан аса ұнамады» дейді дереккөз. 

Басылымның ақпараты бойынша, егер бағасына келісіп, компания сатылып жатса, Ким мен Огай бүкіл бизнесін Ресейге көшіртеді.

Владимир Кимнің өз компаниясынан біршама қарыз алып алғанын аудиттелген қаржы есептілік көрсетіп отыр. Ол өз компаниясына 8 миллиард теңге қарызын төлемей, оны шығындарға жатқыза салды.

2021 жылдың күзінде, Қаңтар оқиғасына дейін «Қазақмыстан» 217 миллиард теңге тағы да қарыз алды. Владимир Кимге оңай қарыз беретін «Қазақмыс» басқа банктерге 77 миллиард теңге қарыз екен.

«Назарбаев тобының бизнестерін Қазақстаннан Ресейге ауыстыра бастағаны байқалады. Түренге алғашқы соқаны Назарбаевтың өзі салды. Оның қаржылық тобы Ресейдің Азия-Тынық мұхиты банкін сатып алды.

Банкке уақытша қазақ қаржыгері Қайрат Алтынбеков басшылыққа келді. Енді Назарбаевтың артынан оның олигархтары да кететіні сөзсіз» деп түйіндеді басылым.