QazaqGaz елдегі су тасқынына байланысты көмек көрсету үшін 1 млрд теңге бөледі

«QazaqGaz» ҰК» АҚ орталық аппаратында су тасқынынан зардап шеккен өңірлердегі төтенше жағдайға байланысты жедел штабтың кезекті отырысы өтті, деп хабарлайды Orda.kz.

Ұлттық компанияның басшысы Санжар Жаркешовтің төрағалық етуімен еншілес және тәуелді ұйымдардың бас директорлары, сондай-ақ өндірістік филиалдар мен магистральдық газ құбырлары департаменттері директорларының қатысуымен бейнеконференция байланысы арқылы шара өтті.

Жедел штаб отырысы барысында қатысушылар су тасқынының зардаптарын жою бойынша қабылданып жатқан шараларды, сондай-ақ зардап шеккен өңірлердің тұрғындарына қажетті көмек көрсетуді талқылады.

«Мен QazaqGaz компаниялар тобының барлық қызметкерлеріне үйлесімді және адал жұмысы үшін алғысымды білдіргім келеді. Ерікті көмектен бөлек, газшылар өздерінің басты міндеттерін - табиғи төтенше жағдайға қарамастан халықты газбен үздіксіз және қауіпсіз қамтамасыз етуді орындайды», - деді Санжар Жаркешов.

Сондай-ақ, ол QazaqGaz табиғи апатқа байланысты көмек көрсету үшін 1 млрд теңге бөлетінін баса айтты.

Бүгінгі таңда өңірлерде апаттық-құтқару және су тасқынына қарсы жұмыстарға QazaqGaz компаниялар тобының 915 қызметкері мен 205-ке жуық техника жұмылдырылған. Оның ішінде Атырау облысындағы табиғи апаттармен күресуге бағытталған Қашағандағы газ өңдеу зауытының құрылысына 99  техника тартылған.

Су басқан аймақтарда еріктілер жасақтары құрылды. Компаниялар тобының жұмысшылары арасынан шыққан белсенділер өз еркімен азық-түлік сатып алуға бастама көтеріп, ыстық тамақ әзірлеп жатыр.

Су басқан аумақтардан тұрғындарды эвакуациялауға байланысты тұтынушыларды ажыратуды қоспағанда, табиғи газды тасымалдау үзіліссіз жүзеге асырылады.