«Қазақфильм» киностудиясы жаңартылады

«Қазақфильм» киностудиясын жаңғырту жоспарлануда, деп хабарлайды ҚР Мәдениет және спорт министрлігінің баспасөз қызметі.

— Алматыда орналасқан Ш.Айманов атындағы ең үлкен киностудия жаңартылады, - деді жұма күні өткен алқа мәжілісінде Мәдениет және спорт министрі Асхат Оралов.

Оның айтуынша, мұндай шаралар отандық киностудияға жаңа жағдай жасап, техникалық мүмкіндіктерін арттырады.

Сонымен қатар, театр ғимараттарын салу және қалпына келтіру жұмыстары жүргізілетіні хабарланды. Соңғы жылдары елімізде жаңа ғимараттар: Қ.Қуанышбаев атындағы театр, Түркі әлемінің рухани астанасы Түркістанда  музыкалық-драма театр, Петропавлда С.Мұқанов атындағы музыкалық-драма театрлары  бой көтерді. Соңғысы  2022 жылы бой көтерген және тәуелсіздік жылдарында Солтүстік Қазақстан облысы аумағында салынған алғашқы театр болды.

— Үш жылдан кейін, яғни 2026 жылы Қазақ ұлттық драма театры 100 жылдығын атап өтеді. Мұндай маңызды оқиғаға алдын ала дайындалу керек. Барлық қалпына келтіру жұмыстары жүргізілетін болады. Ұлы Мұқанның мұрасы өткеніміз бен бүгінімізді байланыстыратын алтын көпір болуы керек, - деді Оралов.