«Qazaq Stroy»  3,5 миллиардтан астам қаржыны мәжбүрлі түрде өтейді

Экологиялық жанжалға қатысы бар «Qazaq Stroy» компаниясынан 3,5 миллиард теңгеден астам қаржы күштеп өндірілмек.

Компания Алматыда заңсыз түрде құм қазып, топырақ пен құрылыс қалдықтарын төгіп келген. Мемлекетке келтірілген залал 3,5 миллиард теңгеден асады. Сот шығынды өтеу туралы шешім шығарғанымен, компания басшылығы бұл шешіммен келіспей, аппеляциялық шағым түсіріп, кейін Жоғарғы сотқа жүгінген. Барлық жерде компания кінәлі деп танылды. Енді компаниядан 3,5 млрд теңге  мәжбүрлеп өндіріледі, деп хабарлайды Алматы қаласы Экология департаменті.

Алғашында құрылыс маңындағы саяжай тұрғындары «Qazaq Stroy» компаниясының жұмысына шағыммен экология департаментіне жүгінген. Экологтар тексеру жүргізіп, заң бұзушылықтарды анықтап, кейін сотқа берген.

Сот процесі екі жылға созылды. Осы уақыт ішінде «Qazaq Stroy»  компаниясының басшысы Нұрлан Артықбаев сот оны заңсыз құм өндіру және ірі көлемде қалдықтарды төгу үшін кінәлі деп тапқаннан кейін де президент Тоқаевтан «белсенді қоғамдық жұмысы үшін» Құрмет орденін алды.