Qazaq Air Ресейге рейстерін тоқтатты

Qazaq Air көрші елге рейстерді орындауға дәрменсіздігін жариялап, рейстерді тоқтатты.

Qazaq Air Ресейге ұша алмайтынын және рейстерді тоқтатқанын хабарлады. Осы себепті 12 наурыз күні таңертең Новосібір рейсінің жолаушылары ұшып кете алмаған. Себебі, сақтандыру ұйымдары көрші елдің аумағында және оның әуе кеңістігінде сақтандыруды қамтамасыз етпейді.

 «Qazaq Air сақтандыру компаниясынан Ресей аумағында және оның әуе кеңістігінде сақтандыруды қамтамасыз етпегені туралы хабарлама алды. Осы жағдайға байланысты әуе компаниясы Ресей аумағы бойынша сақтандыруды қамтамасыз ету мәселесі шешілмейінше Ресейге рейстерді орындай алмайды. Осыған байланысты Новосібірге бүгінгі рейс (осы жылдың 12 наурызы) тоқтатылды»  делінген компанияның баспасөз қызметі таратқан хабарламада.

Жолаушыларға билеттер құнын толығымен қайтару ұсынылады. Қайтару сатып алу орнында жүзеге асырылады. Билет әуе компаниясынан сатып алынған болса, info@flyqazaq.com мекенжайына хабарласыңыз. Ақшаны қайтару туралы өтінішпен бірге сіз брондау нөмірін және байланыс деректерін көрсетуіңіз керек. Егер билет агенттікте сатып алынған болса, сіз сатып алу орнына хабарласуыңыз қажет.

«Уақытша қолайсыздықтар үшін кешірім сұраймыз. Біз барлық жолаушыларды кестедегі ықтимал өзгерістер туралы келесі күндері хабардар етеміз. Qazaq Air қазақстандық және халықаралық стандарттарға сәйкес ұшу қауіпсіздігінің барлық талаптарына сәйкес келеді»  деп атап өтті Qazaq Air.

Тіпті бір күн бұрын әуе компаниясы Ресейге тұрақты рейстерін жалғастыратынын хабарлады. Қазан, Омбы, Новосібір, Екатеринбург қалаларына 12 рейс жоспарланған.

Бұл ретте дәл осындай себептермен (сақтандыруды тоқтату) «Эйр Астана» Ресейге рейстерді тоқтатты. Ал SCAT жақында  Нұр-Сұлтан – Мәскеу бағыты бойынша тұрақты рейстерді аптасына екі рейстен жеті рейске және Алматы – Мәскеуге аптасына жеті рейске дейін арттыратынын хабарлады.