Қауіпсіздік Кеңесі хатшысының экс-орынбасары сатқындық жасады деген күдікке ілінді - дереккөз

ҚР Қауіпсіздік кеңесі хатшысының бұрынғы бірінші орынбасары Марат Шайхутдинов қамауға алынды: ол тыңшылық жасады және үшінші елдердің пайдасына мемлекеттік құпияны жариялады деген күдікке ілінді.

Бұл туралы саясаттанушы Ербол Еділов Telegram-арнасында хабарлады.

«Биылғы жылдың наурыз айында қызметінен босатылған Қауіпсіздік Кеңесі хатшысының бұрынғы бірінші орынбасары Марат Шайхутдинов тыңшылық жасады және үшінші елдердің пайдасына мемлекеттік құпияны жариялады деп айыпталуда. Ол қамауға алынды» делінген жазбада.

Еске салсақ, 28 наурызда Қасым-Жомарт Тоқаев Шайхутдиновты Қазақстан Қауіпсіздік кеңесі хатшысының бірінші орынбасары қызметінен босатты. Сондай-ақ, сәуір айында Қазақстан Президентінің өкімімен Данияр Есин ҚР Қауіпсіздік Кеңесінің Ахуалдық орталығының басшысы қызметінен босатылды.

Айта кетсек, 25 наурыз Orda.kz Марат Шайхутдиновтың ұсталуы туралы ақпараттың расталмағанын хабарлаған болатын.