Қасым-Жомарт Тоқаев қазақстандықтарды Отан қорғаушылар күнімен құттықтады

7 мамырда Қасым-Жомарт Тоқаев әскерилерді Отан қорғаушылар күнімен құттықтады, деп хабарлайды мемлекет басшысының баспасөз қызметі.

«Құрметті қазақстандықтар! Сіздерді Отан қорғаушылар күнімен шын жүректен құттықтаймын! Бұл мереке тек әскери қызметкерлер үшін ғана емес, бүкіл қоғамымыз үшін ерекше маңызға ие. Елді қорғау – әрбір азаматтың қасиетті борышы, шынайы патриотизмнің жарқын көрінісі. Қорғаныс қабілетін ұдайы арттыру – мемлекеттің стратегиялық міндеттерінің бірі. Қазақ әскері Отан қорғауға табандылықпен қарсы тұруға кез келген сәтте дайын болуы керек. Қарулы Күштер еліміздің егемендігі мен тұтастығының сенімді кепілі, халық бірлігі мен ертеңгі күнге деген сенімінің тірегі іспетті», - делінген хабарламада.

Ол бүгінде әскерилер жеріміздің тыныштығын күзетіп, батыр бабаларының даңқты дәстүрін жалғастырып жатқанын атап өтті. Олардың қауіпсіздік бойынша атқарған ардақты   қызметі өз өнегесімен кейінгі ұрпаққа шабыт береді.

«Барлық сарбаздар мен офицерлерге антқа адалдық танытып, қызметтік борышын мінсіз атқарғаны үшін алғыс айтамын. Ержүрек әскеріміздің қуаты нығайып, мемлекетіміздің іргесі қашанда мызғымас болсын! Әскери қызметшілерге, ардагерлерге және барша жерлестерге зор денсаулық, амандық және  бейбіт аспан тілеймін!» – деді Қасым-Жомарт Тоқаев.