Қарашығанақта мұнай өндіру тоқтатылады

Бұл туралы ҚР Энергетика министрлігінің баспасөз қызметі хабарлады. Белгілі болғандай, республикадағы ең ірі мұнай-газ кен орнында жоспарлы күрделі жөндеу жүргізіледі.

«12 қыркүйек пен 6 қазан аралығында кен орнында жоспарлы күрделі жөндеу жүргізу үшін Қарашығанақта мұнай өндіруді тоқтату жоспарлануда» деп түсіндірді министрлік.

Қарашығанақ кен орны әлемдегі ең ірі кен орындарының бірі. Оның барланған мұнай қоры 1,2 млрд тоннаны, газы – 1,35 трлн текше метрді құрайды. Кен орнын игеру 1997 жылы халықаралық консорциуммен басталды: Shell (29,25%), Eni (29,25%), Chevron (18%), ЛУКОЙЛ мұнай компаниясы (13,5%), ҚазМұнайГаз (10%).

Тамыз айында Қазақстан мұнайын әлемдік нарыққа жөнелтетін Каспий құбыр консорциумы табылған ақауларға байланысты үш қашықтан байлау қондырғысының екеуін жөндеу туралы хабарлаған болатын. Осыған байланысты мұнайды тасымалдауға өтінімдер қысқартылған көлемде қабылдануда.

Бұл ретте 7 қыркүйекте «Қазмұнайгаз» ұлттық компаниясының баспасөз қызметі КТК арқылы мұнайды тиеу кестеге сәйкес жүріп жатқанын хабарлады.