Қарақалпақстанды көркейтуге 1,5 триллион сум бөлінеді

Конституцияға өзгертулер мен толықтырулар енгізу жөніндегі референдумнан кейін Өзбекстан президенті Шавкат Мирзиеев Қарақалпақстанға жұмыс сапарымен барды.

Мемлекет басшысы жергілікті тоқыма кәсіпорнын аралап, халықпен әңгімелесті, деп хабарлады президенттің баспасөз қызметі.

Мирзиеев биыл билік Қарақалпақстанды көркейтуге 1,5 триллион сум бөлетінін айтты. Облыста жолдарды, су және электр жүйелерін жаңғырту, мектептер, балабақшалар мен медициналық пункттер салу және жөндеу жұмыстары жоспарлануда.

«Сонымен қатар Қарақалпақстандағы 452 махалланың әрқайсысына 500 миллион сум көлемінде қосымша қаржы бөлінетін болады. Өз мәселелерін жергілікті тұрғындар жақсы біледі. Сондықтан біз қаражат береміз, әрі қарай олар өздері бақылайды. Сонда сапа да, пайда да болады. Адамдар разы болады», - деді Мирзиёев.

Айтпақшы, Өзбекстан Конституциясына өзгертулер мен толықтырулар енгізу жөніндегі референдумда дауыс беру қорытындысы бойынша Қарақалпақстан белсенді аймақтардың біріне айналды. Орталық сайлау комиссиясының мәліметінше,  түскі уақытта республикада сайлаушылардың 76,56 пайызы дауыс берген.