Қаңтар оқиғасында оққа ұшқан Айкөркемнің өліміне байланысты тергеу тоқтатылды

Алматы қаласында қаңтар оқиғасы кезінде оққа ұшқан 4 жасар Айкөркем Мелдеханның қазасын тергеу тоқтатылды. Азаттық мәліметінше, тергеу органы бұл істі «құпия» еткен.

Айкөркем Мелдехан 7 қаңтар күні Алматыда дүкен іздеген жақындарына ілесіп жүрген кезде оққа ұшқан. 4 жасар қыздың 16 жастағы әпкесі жараланған.

4 жасар бүлдіршіннің әкесі тергеудің тоқтатылғанын «масқара жағдай» деп атады. Оның айтуынша, енді іс материалдарын да көре алмайды.

– Бұл масқара ғой, сөзім жоқ. Қызымды өлтіргендерді табудың орнына істі тоқтатқан, онысымен қоймай істі «құпия» етіпті. Желтоқсанның аяғында тоқтатыпты. Кеше оны естіп адвокатым айқай-шу шығарғаннан кейін хат жіберіпті. Енді іс материалдарын да көре алмайтын болдық. Не істерімді де білмей отырмын, ести сала қолхат жазып ауруханадан бүгін шықтым, – деді 6 қаңтарда Айдос Мелдехан Азаттыққа.