Қала балансына өткізгеннен кейін барлық мәселені шешеміз - Досаев «Қайрат» ФК туралы

27 қазанда Алматы қаласының әкімі Ерболат Досаев Наурызбай ауданының тұрғындарымен кезекті жиын өткізді.

Кездесу барысында әкім азаматтарға «Қайрат» футбол клубының алдағы тағдырын түсіндірді. Оның айтуынша, клуб көмекке мұқтаж.

- Біз клубқа көмектесуіміз керек. Барлық жақсы ойыншылар басқа клубтарға кетті, өйткені олар көп төлейді, - деді әкім.

Өз кезегінде Досаев клуб әлі жекенің қолында екенін, бірақ әкімдік оның қала балансына өтуін күтіп отырғанын айтты.

- Жеке меншікте болғандықтан шешімді күтіп отырмыз. Олар қаланың теңгеріміне өткеннен кейін барлық мәселені шешеміз. Қазір бұл жеке клуб. Ол бізге әлі берілген жоқ, берілісімен қала көмектеседі. Сот шешсін, - деп жауап берді Досаев.

Қазан айының ортасында БАҚ-та Қайрат Боранбаевтың тергеумен мәміле жасап, «Қайрат» футбол клубын Алматы әкімдігінің пайдасына қайта жазып бергені туралы ақпарат тарай бастады. Сол күні «Қайрат» ФК ресми сайты ақпаратты жоққа шығарды.

Еске салсақ, Қайрат Боранбаев 2022 жылдың наурызынан бастап тергеу изоляторында болғанына қарамастан, үлкен активтерге, соның ішінде футбол клубына иелік етуді жалғастыруда.