Путиннің ұшағы Мәскеуден ұшып кетті, Ресейде әуе билеті бірнеше есе қымбаттады

Мәскеуден ұшып шыққаннан кейін бірнеше минуттан соң президент ұшағы радардан жоғалып кетті, деп хабарлайды Orda.kz ресейлік «Маңызды оқиғалар» Telegram арнасына сілтеме жасап.

Басылым Flightradar24 халықаралық ресурсына сілтеме жасап хабарлағандай, борт нөмірі RSD697 болатын Ил-96 ұшағы Внуково әуежайынан көтеріліп, Санкт-Петербургке бет алған. Біраз уақыттан кейін ұшақ бағыты туралы деректерді беруді тоқтатты.

Билет сатудың барлық қызметтері бойынша Мәскеуден Ыстамбұлға, Алматыға, Астанаға, Ереванға және Тбилисиге билеттерге асығыс сұраныс көбейген.

Мәселен, 24 маусымда трансфермен Мәскеуден Алматыға билет құны 2 миллион теңгеден асты, 25 маусымда тікелей бір жақты рейс 382 000 теңге болды.

Бұл ретте Ресей туроператорлар қауымдастығы билеттерге сұраныстың жоқтығын атап өтеді. Ұйым Ыстамбұлға  дейін 24 маусымға билет барын айтқан болатын, бірақ Orda.kz тілшісі оны таппады.