Путин әскери қызметке қатысты түзетулер пакетіне қол қойды

Ресей президенті Владимир Путин Қылмыстық кодекске әскери қызметке қатысты түзетулер пакетіне қол қойды.

Құқықтық ақпараттың ресми порталында «Ресей Федерациясының Қылмыстық кодексіне және Ресей Федерациясының Қылмыстық іс жүргізу кодексінің 151-бабына өзгерістер енгізу туралы» Федералдық заң жарияланған.

Сонымен, Қылмыстық кодекске «Талан-тараж» деген жаңа бап енгізілді. Бұл қылмысы үшін алты жылдан 15 жылға дейінгі мерзімге бас бостандығынан айыру жазасы көзделген.

Тағы бір жаңа бап – «Өз еркімен берілу». Бұл үш жылдан он жылға дейін қауіп төндіреді. Бірақ егер мұндай қылмысты алғаш рет жасаған әскери қызметші тұтқыннан  босану шараларын қолданса, қызмет орнына қайтып оралса және тұтқында басқа қылмыстар жасамаса, онда ол жауаптылықтан босатылуы мүмкін.

Әскери шақыру бойынша әскери қызметтен қашу немесе келмеу - бес жылдан он жылға дейiнгi мерзiмге бас бостандығынан айыруға жазаланады. Оның үстіне запастағы және әскери оқуға шақырылған әскери қызметшілер келісімшарт бойынша әскери қызметшілермен бірдей жауапкершілікке тартылады.

Сонымен қатар, әскери бұйрықтарды орындамау, ұрыс қимылдарына қатысудан бас тарту, әскери қызмет бастығына қарсылық көрсету, қызмет тәртібін бұзу, әскери мүлікті жоғалту үшін де жауапкершілік күшейтілуде.

Кейбір түзетулер мемлекеттік тапсырыс бойынша шарттарды орындауға қатысты - шарт талаптарын бірнеше рет бұзған қызметкер төрт жылдан сегіз жылға дейін бас бостандығынан айрылады. Ал егер тапсырма орындалмаса немесе залал кемінде бес миллион рубльді құраса - бес жылдан он жылға дейінгі жазаны арқалайды.

Әскери қызметке қарсы қылмыстар тек қарулы қақтығыс немесе ұрыс қимылдары жағдайында ғана емес, сондай-ақ жұмылдыру немесе соғыс жағдайы кезеңінде, соғыс уақытында жасалса, ауырлататын мән-жай қаралады.

Түзетулер ресми жарияланған күнінен бастап күшіне енеді.