Путиннен Қазақстандағы көтерілісті ұйымдастырушыға Ресей азаматтығын беруді сұрады

Владимир Путиннен Украинада сепаратистер жағында соғысқан Көкшетау облысындағы ресейшіл көтерілісті ұйымдастырушы Виктор Антошкоға жеңілдетілген тәртіппен азаматтық беру сұралды, деп хабарлайды Orda.kz порталы.

24 сәуірде Омбы облыстық БК55 басылымы Ресей президенті Владимир Путинге ашық хат жариялады. Ол белгілі бір «Казак халқының атамандар кеңесінің» атынан жазылған. Хат авторлары Путиннен 1990 жылдардың аяғында Көкшетау облысында көтеріліс тудырмақ болған қазақстандық Виктор Антошкоға Ресей азаматтығын беруді сұрайды.

Антошко – ресейшіл сепаратист. 1990 жылдары Қазақстан тәуелсіздігін жариялағаннан кейін мемлекетке қарсы белсенді күрес жүргізді. Виктор Антошко ағасы Юриймен бірге «Сібір казактары армиясының Кокчетав бөлімі» деп аталатын бөлімді басқарды.

1996 жылдың көктемінде ағайындар Көкшетау облысында «халық республикасын» құру үшін көтеріліс жасамақ болды.

Олар Ресейдегі осы шытырман оқиғаға қатысуы тиіс жақтастарды жалдаған болатын.