Путинге әскерді Донбаста пайдалануға келісім берілді

Ресей сенаторлары президент Владимир Путинге Донбастағы өзін-өзі жариялаған республикаларда әскерді пайдалануға келісім беру үшін бірауыздан дауыс берді.

Риа Новостидің ақпаратына сәйкес, шешімге 153 сенатор дауыс берді, қарсылық танытқандар және қалыс қалғандар жоқ.

Федерация кеңесінің спикері Валентина Матвиенко түсіндіргендей, президенттің келісімі қанды соғысты тоқтату үшін Донбаста бейбітшілік орнатуға бағытталған.

Федерация кеңесінің спикері келісім беру туралы қаулы бүгін Ресей мемлекетінің басшысына жіберілетінін айтты. Конституциялық комитеттің басшысы Андрей Клишастың айтуынша, құрылымдардың жалпы санын, олардың әрекет ету аймақтарын, Ресейден тыс жерде болу мерзімін президент Конституцияға сәйкес анықтайды.

Естеріңізге сала кетейік, 21 ақпанда Ресей президенті Владимир Путин ДХР және ЛХР-ды мойындау туралы жарлыққа қол қойып, Ресей армиясына сол жерде бейбітшілікті қамтамасыз етуді тапсырды.