Путинде «қылмыстық қудалаудан» өмір бойлық иммунитет болады

Ресей парламентінің төменгі палатасы экс-президенттің жеке басына тиіспеуге кепілдік беретін заң жобасын қабылдады.

Заң биыл жазда референдум арқылы қабылданған Конституцияға енгізілген өзгерістер негізінде әзірленді. Түзетулер президент Владимир Путинге 2036 жылға дейін билікте қалуға мүмкіндік береді.

Заң жобасы бұрынғы мемлекет басшысы мен оның отбасын қылмыстық немесе әкімшілік жауапкершілікке тартуға тыйым салуды қарастырмақ. Құжатқа сәйкес, оларды ұстауға, қамауға алуға, тінтуге, тергеуге де рұқсат берілмейді. Тек "мемлекетке опасыздықтық жасады" деп күдікке ілінген бұрынғы басшылар мемлекеттік дума, жоғарғы сот, конституциялық соттың мақұлдауымен жазаға тартылуы мүмкін.

Құжат мемлекеттік думада үшінші оқылымнан өткеннен кейін федералдық кеңеске жөнелтіледі, кейін оған Путин қол қояды.

Еске салсақ, Ресейде 2008-2012 жылдар аралығында мемлекет басқарған Дмитрий Медведев қана экс-президент мәртебесіне ие.