Путин Украинаға әскери араласуды мәжбүрлі шара деп атады

Ресей президенті Владимир Путин Украинаға әскери басып кіруді мәжбүрлі шара деп атады.

«Әскери операция - бұл мәжбүрлі шара. Басқа мүмкіндік жоқ» деді Путин ресейлік телеарнада Ресейдің ірі бизнесмендерімен кездесуінде.

Батыс жариялаған кең ауқымды санкциялар мен ресейлік қор нарықтарының күйреуі аясында ол кәсіпкерлерді «Ресей әлемдік экономиканың бір бөлігі болып қала береді» деп сендірді.

«Біз өзіміз тұрған жүйеге зиян келтірмейміз. Біздің серіктестер мұны түсінуі керек» деді Путин.

Еске салсақ, 24 ақпан күні таңертең Ресей президенті Владимир Путин Украинада арнайы әскери операция өткізу туралы шешімін жариялап, сол арқылы оған соғыс ашты. Украина әскерилерінің айтуынша, шабуылға Беларусь те қатысып жатыр. Украинаға басып кіру Зеленскийдің ресейлік теледидарда сөйлеген сөзі аяқталмай тұрып басталған. Украинада әскери жағдай енгізілді, ал президент Владимир Зеленский украин әскерлеріне ресейлік әскерлерге барынша төтеп беруді бұйырды. Бұған қоса, Украина Ресеймен дипломатиялық қарым-қатынасын үзді.

Айта кетсек, Қазақстанда Украинадағы соғысқа байланысты әуе жолаушыларына сенім телефоны іске қосылды. Сонымен қатар, қазақстандық әуе компанияларына Украинаның үстінен ұшуға тыйым салынды. Ресей Украинамен шекаралас қарулы қақтығыстар аймағындағы барлық елдерге әуе кеңістігін жабуды ұсынды.

Қазақстанның Сыртқы істер министрлігінің мәліметінше, Украинадан қазақстандықтарды эвакуациялау басталды. Украинада 1600-ден астам қазақстандық консулдықта уақытша және тұрақты есепте тұр.

Екі жақтан да бейбіт тұрғындардың қаза тапқаны хабарланып отыр. Осының салдарынан Украина Ресейден әйелдер мен балаларға гуманитарлық дәліз беруді талап етті.

24 ақпан күні кешке Ресей әскерилері Украинадағы 74 әскери инфрақұрылым нысанының жойылғанын хабарлады.

Украинаға басып кіру Ресейдің өзінде жаппай наразылық тудырды - Ресейдің ірі қалаларында жаппай соғысқа қарсы акциялар басталды.