Путин Тоқаевқа Аляскадағы келіссөздердің егжей-тегжейін айтып берді

Қасым-Жомарт Тоқаев пен Владимир Путин телефон арқылы сөйлесті.Қазақстан Президенті  Анкоридж қаласында өткен Дональд Трамппен кездесу нәтижелерімен әріптесін құттықтады.

Оның пікірінше, бұл келіссөздер АҚШ тарапына Украина мәселесі бойынша Ресей ұстанымын жақсырақ түсінуге сеп болды және осы күрделі мәселе бойынша ымыраға келу жолдарын іздеуге көмектеседі.

Қасым-Жомарт Тоқаев Аляскадағы саммитті Ресейдің халықаралық аренадағы позициясын нығайту және өзара түсіністікті арттыру тұрғысынан үлкен серпіліс деп атады.

Сондай-ақ ол сапардың шебер ұйымдастырылғанын атап өтті, бұл қазіргі шиеленіскен жағдайда үлкен саяси маңызға ие екенін жеткізді.

Өз кезегінде Владимир Путин Аляскада өткен келіссөздердің кейбір нақты қырлары жөнінде әріптесін хабардар етті.

Әңгіме соңында Қазақстан Президенті энергетика саласындағы конструктивті ынтымақтастық үшін Ресей басшысына алғысын білдірді.

Айта кетейік, Қазақстан Владимир Путин мен Дональд Трамп арасындағы келіссөздерді оң бағалады. Мемлекет басшысы бұл кездесулерді тарихи деп атады.

АҚШ Президентімен кездесу қарсаңында Владимир Путин Қасым-Жомарт Тоқаевқа қоңырау шалған болатын. Ал екі күннен кейін, Украина тарапының бастамасымен, Мемлекет басшысы Украина Президенті Владимир Зеленскиймен телефон арқылы сөйлесті.