Путин шұғыл мәлімдеме жасады

Ресей президенті Владимир Путин АҚШ-тың Украинаға Ресей аумағына алыс қашықтықтағы қару арқылы шабуыл жасауға рұқсат бергені туралы түсініктеме берді, деп хабарлайды Orda.kz .

«Медузаның» хабарлауынша, Путин Украина қарулы күштерінің ATACMS зымырандарымен Ресейге шабуыл жасағанын мәлімдеді. Осыдан кейін ол «қақтығыс жаһандық сипатқа ие болғанын», бірақ бұл «арнайы операцияның» барысына еш әсер етпейтінін жеткізген. 

«Біздің әскерлер байланыс шебінің барлық бағытында алға сәтті жылжып келеді. Алдымызға қойған барлық міндеттерді орындаймыз»,– деді Путин.

Сонымен қатар, Путин Ресейдің Днепрге орта қашықтықтағы «Орешник» баллистикалық зымыранымен жауап соққы жасағанын растап, сынақтың сәтті өткенін айтты.

«Алдағы сынақтар Ресейге төнетін қауіпке байланысты болады. Егер жағдай ушығатын болса, біз де табанды түрде жауап қайтарамыз. Біз ашық, жария түрде, қарсыластан қорықпай жауап қайтаратын боламыз. Өйткені мұндай қаруға қарсы басқа шара жоқ. Қолданыстағы әуе шабуылына қарсы қорғаныс жүйелері мұндай зымырандарды ұстап қала алмайды»,– деді Ресей президенті.

Сондай-ақ, Путин соққы ядролық емес гипердыбыстық жабдықтағы баллистикалық зымыранмен жасалғанын нақтылады. Ресей орта және шағын қашықтықтағы зымырандарды қолдануды жоспарламағанын, алайда АҚШ-тың осындай әрекеттеріне жауап ретінде осындай шешім қабылданғанын атап өтті. Оның айтуынша, АҚШ әскер мен зымыран жүйелерін тасымалдау және оқу-жаттығуларды өткізу бойынша жақсы тәжірибе жинақтағанын айтты.