Путин: Ресей үшін шетелдегі отандастарды қолдау маңызды

Ресей президенті Владимир Путин шет елдерде тұратын орыс қауымын қолдау және оларға көмектесу Ресейдің маңызды басымдықтарының бірі екендігін айтты.

Бұл туралы Orda.kz РИА Новости сайтына сілтеме жасап хабарлайды.

Шетелде тұратын орыс ұлтының VII дүниежүзілік конгресіне қатысушыларға жолдауында Владимир Путин шетелде тұратын ресейліктерді қолдау және оларға көмектесу Ресей Федерациясы үшін маңызы зор екенін жеткізді.

Владимир Путиннің сәлемін Ресейдің Сыртқы істер министрі Сергей Лавров оқыды.

- Отандастарды қолдау, білім беру, мәдениет және әлеуметтік қамсыздандыру саласындағы маңызды жобаларды жүзеге асыруға жәрдемдесу әрдайым маңызды ұлттық басымдықтардың бірі, – деді Ресей сыртқы істер министрі Сергей Лавров.

Путин жолдауда осы бағыттағы жұмысты ұлғайту маңызы туралы мәлімдеді.

Форумға әлемнің жүзден астам елінен делегаттар келді.

Шетелде тұратын ресейлік отандастардың бірінші дүниежүзілік конгресі 2001 жылдың қараша айында Мәскеуде өтті. 47 елден қатысушылар жиналды. 2006 жылдан бастап іс-шара үш жылда бір рет өткізіледі.